Aktori legjendar austriak dhe ish-guvernatori i Kalifornisë, Arnold Schwarzenegger, 76 vjeç, zbuloi në rrjetet sociale se së fundi i kishte implantuar një stimulues kardiak pas tre operacioneve në zemër.
“Tani kam një pjesë të makinës brenda vetes, jam më shumë si personazhi im i Terminatorit”, tha ai me shaka në një episod të podcast-it të tij “Arnold’s Pump Club” ku foli për gjendjen e tij shëndetësore.
“Unë u operova, mora një stimulues kardiak. Kjo që po ju them tani bie ndesh me një pjesë të madhe të edukimit tim në Austri, ku askush nuk flet kurrë për probleme shëndetësore. Gjithçka që lidhet me shëndetin mbahet për vete.
Por kam marrë kaq shumë mesazhe nga njerëz që kanë lindur me një valvul aortale bicuspid, si unë. Më thanë se historia ime u dha kurajo dhe shpresë për të përballuar problemet e tyre shëndetësore”, tha aktori dhe theksoi se ndihet mirë për momentin.
Ai shpjegoi se mjekët e këshilluan që t’i nënshtrohej një operacioni sepse zemra i rrihte në mënyrë të parregullt për shkak të një mbresë nga një operacion i mëparshëm. Aktori bëri për herë të parë një operacion për zëvendësimin e valvulave në vitin 1997, i cili kërkonte një operacion në zemër të hapur. Ai shkoi për një zëvendësim tjetër të valvulës në 2018 dhe gjithashtu bëri një operacion në zemër të hapur. Operacionin e tretë e ka bërë në vitin 2020.
“Dua që ta dini se nuk jeni vetëm. Nëse po shtyni diçka nga frika, shpresoj t’ju frymëzoj të dëgjoni mjekët tuaj dhe të kujdeseni për veten tuaj. Ka pesha që askush nga ne nuk mund t’i ngrejë i vetëm. Por së bashku mund të ngremë gjithçka, mund të ngremë botën”, tha legjendar Arnie. /tesheshi.com/
