Bernd Schuster, gjemani që ka patur një karrierë të gjatë në Spanjë, ku ka luajtur si për Barcelonën, për Realin e Madridit dhe për Atletikon e Madridit, duke e drejtuar Realin edhe si trajner, ka folur për pikat e dobëta të madrilenëve para El Clasico-s.
Siç shkruan e përditshmja sportive spanjolle AS, Schuster e ka quajtur Realin e Madridit një skuadër të zhbalancuar, që po paguan për këtë mungesë ekuilibri, duke vënë në dukje në të njëjtën kohë se dy rivalët, Barcelona dhe Atletiko e Madridit, janë të organizuar më mirë.
“Nëse e marrim skuadrën e Madridit dhe e ndajmë linjë më linjë, ne e dimë se nuk është e balancuar,” ka thënë Schuster.
“Një lojtar duhet të ndryshojë pozicion me një tjetër. Reali nuk e ka bërë këtë dhe po paguan.”
Njeriu që u shkarkua në 2008-ën si trajner i Realit sepse deklaroi që ekipi i tij nuk kishte asnjë mundësi të fitonte ndaj Barcelonës, zgjedh të flasë dhe për katalanasit.
“Mbase çka pëlqej më shumë është mënyra si Barcelona e dominon mesfushën. Reali këtë vit është pas kundërshtarëve.”
“Për momentin është MSN-ja (Messi, Suarez, Neymar) që më bind më shumë. Eshtë e mrekullueshme t’i shohësh,” ka shtuar Schuster, që duket se është i bindur në fitoren e Barcelonës.
Përballja më sfiduese e kampionatit spanjoll, por edhe një prej përplasjeve më të famshme në botën e futbollit, Barcelona – Real i Madridit, do të luhet të shtunën në mbrëmje. /tesheshi.com/
