Kreu i Parlamentit Europian, Martin Schulz në një fjalim përpara Kuvendit shqiptar e cilësoi vendin tonë një model shembullor për marrëdhëniet dhe bashkëpunimin rajonal.
“Shqipëria dhe Serbia po afrohen me njëra-tjetrën në frymën e bashkëpunimit që i duhej rajonit. Kjo nismë vizitash të ndërsjellta më bën të përgëzoj Ramën. Ne, europianët bisedojmë aq gjatë sa të gjejmë një zgjidhje, që mund të rezultojë me raste edhe cfilitës si samiti i fundit në Bruksel, po cfarë ndodh nëse nuk gjendet zgjidhje, ka shkatërrim”, tha ai.
Schulz si një gjerman që jeton në cepin kufitar me Holandën dhe Belgjikën, tha se mënyra më e mirë për t’i menaxhuar problemet me kufijtë është t’i heqësh ato.
Schulz ka kujtuar për deputetët punën e madhe që i pret sa i takon zbatimit të pesë prioriteteve që Shqipëria duhet të përmbushë në procesin e integrimit.
“Ndaj të njëjtat shqetësime me komisionerin Hahn. Reformat në sistemin e Drejtësisë, Gjyqësor që duhet të shfaqet përgjegjës për vendimet që merr, administratës që bazohet në shërbime. Institucionet e pavarura janë celësi drejt një të ardhmeje të drejtë”, theksoi ai.
“Turp për masakrën e Borovës”
Schulz ka përmbledhur para Kuvendit edhe historinë e re të Shqipërisë të cilën e ka cilësuar një vend i madh. Ai kujtoi edhe masakrën e Borovës, hakmarrjen e ushtarëve gjermanë ndaj popullsisë civile për dëmet e pësuara nga partizanët, duke thënë se ndjejmë turp për këtë masakër dhe se akte të tilla nuk duhet të ndodhin kurrë.
Pas mbarimit të Luftës së Dytë Botërore, tha ai, liria nuk erdhi në Shqipëri mbi të cilën ra Perdja e Hekurt që e ndau Europën më dysh.
“Një cerekshekulli nga Lufta e Parë dhe 70 vjet pas Luftës së Dytë, kemi mësuar se të bashkuar jemi më të fortë”, theksoi kreu I PE-së, duke kujtuar se është detyrë e të gjithëve të punojnë kundër rikthimit të forcave që e shkatërruan Europën. /tesheshi/
