Kancelari gjerman Olaf Scholz tha se vendi i tij është shumë serioz për perspektivën e vendeve të Ballkanit Perëndimor në Bashkimin Evropian.
“Si Gjermani, ne jemi shumë seriozë për perspektivën në BE të vendeve të Ballkanit Perëndimor. Dua të them se kjo vlen veçanërisht për Maqedoninë e Veriut”.
Këtë e tha Scholz në një konferencë për media pas takimit me kryeministrin e Maqedonisë së Veriut Dimitar Kovaçevski në Berlin.
Duke theksuar se Gjermania ka “respekt të madh” për identitetin, gjuhën dhe historinë maqedonase, si dhe për përpjekjet reformuese të Maqedonisë së Veriut në rrugën e saj drejt BE-së, Scholz tha:
“Amendamenti i planifikuar kushtetues tani është jashtëzakonisht i rëndësishëm. Shumë varet nga suksesi i tij. E di që kjo nuk është një detyrë e lehtë, por është e nevojshme në kuadër të hapjes së rrugës drejt procesit të anëtarësimit në Bashkimin Evropian”.
I pyetur për marrëdhëniet ndërmjet Kosovës dhe Serbisë, Scholz tha se ka një marrëveshje mes dy vendeve që është propozuar dhe negociuar.
Ai tha se pritet zbatimi i tij dhe tha se shpreson që të gjithë të bëjnë pjesën e tyre për të mundësuar marrëdhëniet e mira fqinjësore.
Paqja në Evropë
Më herët, me rastin e Ditës së Evropës më 9 maj, kancelarI gjermane tha se një vendim i rëndësishëm në formësimin e Evropës gjeopolitike është marrë vitin e kaluar duke i dhënë statusin kandidat disa vendeve dhe me disa prej tyre janë hapur negociatat për anëtarësim.
“Ne u thamë qytetarëve të vendeve të Ballkanit Perëndimor, Ukrainës, Moldavisë dhe në perspektivën e Gjeorgjisë: Ju na përkisni neve, ne duam që ju të bëheni pjesë e Bashkimit tonë Evropian”, tha Scholz.
Ai shtoi se nuk bëhet fjalë për altruizëm, por se për këtë ka arsye ekonomike dhe se bëhet fjalë për besueshmërinë e BE-së.
Ai theksoi se bëhet fjalë edhe për paqen në Evropë pas pikës së kthesës të përfaqësuar nga sulmi rus ndaj Ukrainës. Ai tha se një politikë e drejtë e zgjerimit nënkupton përmbushjen e premtimeve që u janë dhënë mbi të gjitha vendeve të Ballkanit Perëndimor, të cilave u është premtuar perspektiva evropiane 20 vjet më parë.
“Suksesi i politikës së zgjerimit kërkon normalizimin e marrëdhënieve ndërmjet Serbisë dhe Kosovës dhe vazhdimin e zbatimit të reformave në vendet kandidate”, tha Scholz.
KancelarI gjerman ka theksuar në disa raste se ai mbron një rend multipolar në të cilin Evropa do të jetë një vend i mirë për të jetuar, i barabartë me rajonet dhe vendet e tjera të botës. /tesheshi.com/
