Kancelarja gjermane thotë se një marrëveshje për hapat e mëtejshëm konkretë për integrimin evropian të rajonit mund të arrihet në samitin e nëntorit në Berlin.
Samiti i Ballkanit Perëndimor do të mbahet në nëntor në Berlin, për t’i dhënë një shtysë të re “Procesit të Berlinit”, njoftoi të martën kancelari gjerman Olaf Scholz.
Pas një takimi me kryeministrin slloven Robert Golob në Berlin, gjatë të cilit një nga temat ishte zgjerimi i Bashkimit Evropian në Ballkanin Perëndimor, ai tha se mund të arrihet një marrëveshje për hapat e mëtejshëm konkretë për integrimin evropian të Ballkanit Perëndimor.
Scholz theksoi se Ballkanit Perëndimor iu premtua një perspektivë e shpejtë dhe realiste e BE-së në vitin 2003, por ai vlerësoi se pak ka ndodhur që atëherë.
Ai tha se Gjermania dhe Sllovenia dëshirojnë të bashkëpunojnë për t’i dhënë një shtysë të re procesit të anëtarësimit të Ballkanit Perëndimor në BE, njoftoi qeveria gjermane.
Golob, vizita e parë dypalëshe e të cilit jashtë që nga marrja e mandatit, tha se beson se duhet gjetur mënyra që vendet e Ballkanit Perëndimor të ndërmarrin hapa individualë dhe të arrijnë sukses në rrugën drejt BE-së.
“Për fat të keq, ky proces, siç është bërë, është një proces që ka çuar në apati në këto vende, sepse është absolutisht shumë i ngadalshëm”, tha ai.
Golob vlerësoi se BE-ja duhet të fokusohet në shpërblimin e Ballkanit Perëndimor për përparimin në rrugën drejt anëtarësimit në BE, në mënyrë që t’u japë atyre një nxitje për të vazhduar ndjekjen e këtij “qëllimi të largët dhe sfidues”, sipas Reuters.
Ai përmendi çështjen e energjisë si shembull dhe sugjeroi që Maqedonia e Veriut mund të lejohet të marrë pjesë në projekte energjetike në mbarë BE-në sapo vendi të zbatojë të gjitha rregullat e Unionit për energjinë.
Të dy zyrtarët diskutuan edhe për pasojat e luftës në Ukrainë, në radhë të parë për krizën energjetike, ku Golob vlerësoi se mbijetesa e dimrit pa gazin rus është një qëllim shumë ambicioz, por i arritshëm nëse Unioni bashkëpunon.
Scholz tha se BE-ja do të duhet të bëjë gjithçka për të reduktuar varësinë energjetike nga Rusia dhe vuri në dukje përpjekjet për të krijuar infrastrukturë që do të mundësonte nxjerrjen afatshkurtër të naftës dhe gazit nga burime të tjera.
Të dy udhëheqësit mbrojtën vazhdimin e ndihmës politike, ushtarake dhe humanitare për Ukrainën, si dhe sanksionet kundër Rusisë. /tesheshi.com/
