Sulmet kibernetike këtë vit u kanë kushtuar kompanive dhe qytetarëve rusë deri në 3,600 miliardë rubla (49 miliardë dollarë), ka njoftuar huadhënësi më i madh i Rusisë, Sberbank.
Në një përpjekje për të shtypur ekonominë gri, Rusia ka inkurajuar qytetarët të kalojnë në karta bankare dhe të kufizojnë përdorimin e parave të gatshme, por numri i krimeve që lidhen me kartat bankare është rritur gjashtë herë këtë vit, vlerësoi Ministria e Brendshme.
Stanislav Kuznetsov, zv.drejtori i Sberbank i ngarkuar me mbikëqyrjen e sigurisë dhe shërbimeve, i tha Reuters se kompanitë private dhe qytetarët ishin shënjestrat kryesore të sulmeve kibernetike pasi shërbimet e sigurimit të shtetit ishin të mbrojtura më mirë.
“Sektori privat është më i prekshmi, gjithçka ishte në shënjestër, nga llogaritë e klientëve te të dhënat financiare dhe dokumentet e tenderit. Ka rreth 2.3 milion llogari në gjuhën ruse në darknet që ofrojnë të dhëna të vjedhura,” tha ai.
Mashtrimet telefonike, gjithnjë e më të zakonshme
Kriminelët kibernetikë që flasin rusisht veprojnë nga Gjermania, Ukraina dhe Venezuela, si dhe nga vetë Rusia, tha Sberbank.
Kjo bankë shtetërore ka departamentin e saj të sigurisë kibernetike BI. ZONE, e cila ofron mbrojtje të TI-së ndaj sulmeve kibernetike ndaj bankave dhe klientëve.
Bankat, duke përfshirë Sberbank, janë më të mbrojtura se pjesët e tjera të ekonomisë, por ka gjithnjë e më shumë mashtrime telefonike në të cilat një person prezantohet si një punonjës i bankës me telefon dhe i kërkon klientit të sigurojë informacionin e kartës, tha Kuznetsov.
Vitin e kaluar, banka qendrore ruse regjistroi më shumë se gjysmë milioni operacione të paautorizuara në llogaritë bankare në Rusi, në të cilat 6.4 miliardë rubla ishin vjedhur nga llogaritë bankare private dhe të korporatave. /tesheshi.com/
