SBASHK-u është duke përcjellë nga afër situatën në shkollat “Isa Boletini” në Boletin, “Kadri Bistrica” në Bistricë dhe shkollën në fshatin Qabër. Mësimdhënësit shqiptar të këtyre shkollave ka dy muaj e gjysmë që nuk kanë marr paga dhe nuk janë informuar pse ka ndodhur kjo.
Ata kanë pritur deri tani duke qenë në shërbim të nxënësve, por mos marrja e pagave po pengon ata që të kryejnë detyrat e tyre sepse nuk kanë para për të udhëtuar as deri në shkollë.
SBASHK-u ka kërkuar përgjigje nga institucionet dhe kishte premtime se kjo çështje do të zgjidhet, e këto premtime kanë bërë që edhe mësimdhënësit e shkollave në veri të Kosovës të punojnë me shpresën se do të gjendet zgjedhje për pagat e tyre.
Pasi që kjo nuk ndodhi, mësimdhënësit e shkollës “Isa Boletini” kanë hyrë në grevë dhe janë deklaruar se do të vazhdojnë me grevën derisa nuk u japin pagat për muajin mars dhe prill. Grevë mund të pritet edhe në shkollën “Kadri Bistrica”.
SBASHK-u mbështet kolegët e këtyre shkollave dhe kërkon nga institucionet e Kosovës që të gjejnë zgjidhje në mënyrë që këta mësimdhënës ti marrin pagat e merituara dhe pastaj të vazhdojnë me procesin mësimor për ta mbyllur me sukses këtë vit shkollor.
