Ambasada Saudite në Tiranë kremtoi 93-vjetorin e bashkimit të territorit të Mbretërisë së Arabisë Saudite ku ishin të ftuar përfaqësues të institucioneve shtetërore, të trupit diplomatik të akredituar në vendin tonë, përfaqësues të komuniteteve fetare, shoqërisë civile, medias, etj.
Ambasadori Faisal Ghazi Hifzi u shpreh në fjalën e tij se “që nga shpallja e bashkimit territorial të saj në vitin 1932, Mbretëria e Arabisë Saudite ka shënuar arritje të jashtëzakonshme dhe falë punës së lidershipit të saj, ka korrur sukses në të gjitha nivelet, atë politik, institucional, ekonomik dhe social”.
Ai theksoi se sot, Mbretëria e Arabisë Saudite zë një pozicion të veçantë mes vendeve të botës, gjë e cila pasqyrohet qartësisht në rolin e saj të spikatur në forumet ndërkombëtare dhe pjesëmarrjen efektive, si anëtare e organizatave rajonale, islamike dhe ato ndërkombëtare.
Në nivel të brendshëm, ambasadori nënvizoi se Mbretëria ka ndërmarrë reforma ekonomike dhe strukturore të mëdha për të arritur ekuilibrin financiar, diversifikimin e burimeve të të ardhurave, vazhdimësinë e rritjes makroekonomike, rritjen e efikasitetit në shpenzimet qeveritare dhe nxitjen e investimeve në sektorin privat, i cili është partneri kryesor në përmbushjen e Vizionit 2030.
Hifzi shtoi se ky vizion synon të vërë në funksion kapacitetet dhe energjitë e shoqërisë saudite, në mënyrë të tillë që e radhit Mbretërinë në listën e vendeve të zhvilluara dhe i mundëson të ketë rol udhëheqës dhe konstruktiv në arenën ndërkombëtare, mbështetur mbi një bazë solide ekonomike dhe një ambient investimi efikas.
Më tej, diplomati i Mbretërisë së Arabisë Saudite u ndal te marrëdhëniet mes dy vendeve tona në të gjitha nivelet dhe fushat.
“Progresi i jashtëzakonshëm në marrëdhëniet mes dy vendeve është pasqyruar në shkëmbimet e vizitave të nivelit të lartë mes dy palëve dhe nënshkrimin e një sërë memorandumesh mirëkuptimi, krahas vendimit të Qeverisë së Mbretërisë së Arabisë Saudite, për të lejuar qytetarët e Republikës së Shqipërisë të marrin vizë turistike me mbërritjen në një nga pikat hyrëse të Arabisë Saudite”, deklaroi ambasadori. /atsh/
