Një delegacion i rangut të lartë saudit u takua në Damask me liderin e ri të Sirisë, Ahmad al-Sharaa, i njohur ndryshe si Abu Mohammed al-Jolani, tha sot një burim i afërt me qeverinë për AFP.
Ky takim, i cili u zhvillua dje, të dielën, është kontakti i parë zyrtar i njohur mes qeverisë së Arabisë Saudite dhe administratës së re siriane.
Kjo vjen dy javë pasi një koalicion opozitar i udhëhequr nga grupimi Hayat Tahrir al-Sham (HTS) rrëzoi regjimin e Bashar al-Assadit, pas një ofensive të rrufeshme.
Delegacioni saudit diskutoi kryesisht “situatën në Siri” dhe “eliminimin e tregtisë së paligjshme të captagonit”, një drogë sintetike e ngjashme me amfetaminën, e cila ka depërtuar dhe në Mbretëri, ku pra i atribuohet ish-regjimit sirian.
Arabia Saudite kishte bërë thirrje në fillim të shtatorit për përpjekje të bashkërenduara për të parandaluar që Siria të zhytet në “kaos dhe ndarje” pas rënies së Assadit.
Nën ish-presidentin alevit, Siria ishte bërë një shtet droge që lulëzonte me tregtinë e paligjshme të captagonit, me pasoja në Arabinë Saudite.
Pas vitesh izolimi për shkak të shtypjes së një kryengritjeje popullore në vitin 2011 që u shndërrua në një luftë civile, Siria e Bashar al-Assad ishte kthyer në skenën ndërkombëtare me ribashkimin e saj në Ligën Arabe në maj 2023.
Riadi, i cili mbështeti grupet opozitare siriane në fillim të konfliktit dhe mbylli ambasadën e tij në vitin 2012, kishte rikthyer marrëdhëniet me Damaskun dhe rihapi misionin e tij diplomatik në kryeqytetin sirian.
Gjthashtu, në Damask mbërriti zëvendësministri i Jashtëm i Katarit, Mohammed al-Hulaifi, në fluturimin e parë të Qatar Airëays në kryeqytetin sirian pas përmbysjes së Assadit.
Kështu, një pjesë e botës arabe po vendos kontakte me pushtetin e ri sirian, deri më tani pa asnjë dritëhije dhe pa akte të kritikueshme. Por siç dihet, pas këtij pushteti të ri qëndron Turqia dhe për këtë arsye, disa vende arabe e muslimane bashkë, sa për xhelozi historike e sa për arsye gjeopolitike, e kanë dhe do e kenë të vështirë të pranojnë realitetin e ri në Siri. Gjithsesi, Saudia e tejkaloi vetëveten, duke dhënë një shembull pozitiv në këtë drejtim. /tesheshi.com/
