Shërbimet e sigurisë në Mekë kanë larguar më shumë se 300,000 pelegrinë të paregjistruar, një javë para fillimit të pelegrinazhit vjetor – Haxhit – në qytetin e shenjtë musliman në Arabinë Saudite.
Menaxhimi i turmës në këtë tubim të madh fetar ka qenë jashtëzakonisht i vështirë në të kaluarën.
Midis pelegrinëve të paregjistruar të detyruar të largohen nga Meka janë 153,998 të huaj me viza turistike dhe 171,587 sauditë, të cilët gjithashtu nuk kishin lejen e kërkuar për të marrë pjesë në Haxh.
Haxhi, i cili këtë vit fillon më 14 qershor, është një nga pesë shtyllat e Islamit dhe çdo musliman duhet ta bëjë të paktën një herë në jetë nëse ka mundësi.
Që nga e shtuna e kaluar, më shumë se 1.3 milionë pelegrinë kanë udhëtuar në Arabinë Saudite, sipas autoriteteve të mbretërisë.
Vendet më të shenjta të Islamit, Meka dhe Medina, ndodhen në Arabinë Saudite.
Mbretëria fiton disa miliardë euro të ardhura nga Haxhi dhe pelegrinazhi më i vogël, i njohur si Umra, që organizohet në periudha të tjera të vitit.
Pelegrinazhet gjithashtu i japin prestigj mbretit saudit, i cili mban titullin e nderit të “Kujdesit të dy xhamive të shenjta”, Mekës dhe Medinës. /tesheshi.com/
