Ish-presidenti i Francës në vitet 2007-2012 nuk do të mund të kthehet më në atë post. Nicolas Sarkozy ka humbur dje në zgjedhjet paraprake brenda partisë së tij, i detyruar kështu të heqë dorë nga synimi për ta qeverisur edhe një Francën.
“Republikanët” kanë zgjedhur për garën e mëtejshme për kandidatin presidencial dy ish-kryeministra. François Fillon mblodhi në parapraket e së dielës 44.1 për qind të votave, ndërsa Alain Juppe pati 28.2 për qind të tyre.
Në përpjekje për të fituar kandidaturën brenda partisë së qendrës së djathtë, Sarkozy zgjodhi gjatë muajve të fundit një ligjërim deri diku ekstrem, aq sa shpesh fjalët e tij u ngjanin atyre të Marine Le Pen-it. Por asgjë nuk e ka ndihmuar ish-presidentin, që ka dështuar shpejt.
Vetëm 21 për qind të votave kanë qenë për të; Sarkozy e ka pranuar humbjen.
“Dështova të bind një shumicë votuesish,” u ka thënë ai gazetarëve dhe mbështetësve pasi është mësuar rezultati i paraprakeve.
François Fillon, ish-kryeministri gjatë qeverisjes së tij, do të jetë njeriu që do të mbështesë Sarkozy.
“E çmoj fort Alain Juppe-në, por ndjehem më pranë zgjedhjeve politike të François Fillon-it,” ka qartësuar ish-presidenti.
Fillon dhe Juppe do të përballen me njëri-tjetrin në një tjetër raund paraprakesh brenda republikanëve të dielën e 27 nëntorit. Një raund nga do të dalë kandidati konservator për zgjedhjet presidenciale që do të zhvillohen në maj të vitit të ardhshëm në Francë. /tesheshi.com/
