Tani nuk ka më asnjë dyshim se Nicolas Sarkozy, njeriu që e la presidencën katër vite të shkuara, do të kërkojë edhe një herë tjetër të jetë në postin më të lartë.
Sarkozy e ka bërë të qartë një ditë më parë se do të garojë sërish në zgjedhjet presidenciale në Francë për t’u zgjedhur president.
“Kam vendosur të jem kandidat për zgjedhjet presidenciale të 2017-tës,” zgjodhi ai të shkruante në llogarinë e tij në një media sociale, duke vënë në pah ca rreshta nga libri i tij më i ri, që pritet të dalë këto ditë në shitje, Tout pour la France (“Gjithçka për Francën”).
“E ndjeva se kisha fuqinë për ta udhëhequr këtë betejë në një moment të vështirë në historinë tonë,” lexohet po ashtu në publikimin e tij. “Pesë vitet e ardhshme do të jenë të mbushura me rrezik, por gjithashtu me shpresë.”
Ndihmësit e tij kanë deklaruar se ai pritet të japë dorëheqjen si udhëheqës i republikanëve, partisë së qendrës së djathtë, por vetë Sarkozy nuk ka thënë nëse do t’u bashkohet zgjedhjeve paraprake në parti, që do të zhvillohen nga 20 deri më 27 nëntor.
Sarkozy e udhëhoqi Francën si president në vitet 2007-2012, për të humbur më pas ndaj presidentit aktual, François Hollande, që nuk gëzon më mbështetje mes francezëve.
Rivali më i fortë partiak ndaj ish-presidentit brenda republikanëve është Alain Juppe, një figurë e njohur politike, një ish-kryeministër dhe një ish-kryebashkiak i Bordosë. /tesheshi.com/
