Një 29-vjeçar u arrestua nga policia e Sarandës, pasi theu urdhërin e mbrojtjes për të rrahur nënën e tij.
Burime nga policia bënë të ditur se shtetasi Enea Qëndro ka shkelur mbi vendimin e gjykatës që i ndalonte atij t´i afrohej nënës së tij, shtetases E.Q. Kjo e fundit kishte rënë preh e dhunës edhe më parë nga i biri, çka e kishte detyruar ti drejtohej organeve kompetente për t´u mbrojtur.
Por duket se as urdhëri i mbrojtjes nuk i ka bërë punë, pasi 29-vjeçari e ka shkelur atë, deri sa u kap në flagrancë nga policia duke ushtruar presion psikologjik dhe dhunë. Tashmë ai do të përballet me gjykatën dhe mund të rrezikojë edhe burgun.
“Arrestimi i tij është bërë, pasi ka ushtruar dhunë fizike dhe psikologjike ndaj nënës së tij, duke thyer edhe urdhrin e mbrojtës, që Gjykata e Rrethit Gjyqësor Sarandë kishte vendosur për shtetasen E.Q. Materialet u referuan në Prokurori në ngarkim të tij për veprën penale ”Dhuna në Familje” dhe “Veprime në kundërshtim me vendimin e gjykatës”, parashikuar nga nenet 130/a dhe 321/2 të Kodit Penal”, thuhet në njoftimin zyrtar të policisë.
Ngjarja në Sarandë ndodhi një ditë pasi në Tiranë u vra një gjyqtare nga ish-bashkëshorti i saj. Fatmirësisht në rastin e sotëm, policia e Sarandës arriti të parandalonte një ngjarje të rëndë. /tesheshi.com/
