Zgjedhja sërish e Hasan Ruhanit si president i Iranit nuk ishte ndonjë befasi e madhe, duke patur parasysh se në më shumë se tre dekada asnjë pararendës i tij nuk kishte dështuar në sigurimin e mandatit të dytë.
I përshkruar si i moderuar, Ruhani nuk ka harruar megjithatë në fjalën e tij një ditë më parë, me rastin e rizgjedhjes, të ngacmojë fqinjët rajonalë, posaçërisht Arabinë Saudite, përplasjet me të cilën janë të vijueshme prej kohësh.
Ndërsa ka deklaruar se iranianët kishin zgjedhur “angazhimin me botën”, e se kishin hedhur poshtë ekstremizmin, Hasan Ruhanit nuk i ka shpëtuar në komentet e tij vizita e presidentit amerikan në Arabinë Saudite.
“Populli ynë u ka deklaruar vendeve fqinje dhe tërë rajonit se rruga drejt garantimit të sigurisë është përforcimi i demokracisë, e jo mbështetja në fuqitë e huaja.”
Veç kësaj, ai do të shtonte se, “Populli iranian dëshiron të jetojë në paqe dhe në miqësi me pjesën tjetër të botës, por nuk pranon asnjë kërcënim apo poshtërim.”
Irani është një mbështetës i regjimit të Beshar Esadit në Siri; politikat e tij rajonale janë parë si destabilizuese. /tesheshi.com/
