Zyrtari i Komisionit Evropian Jan Gert Koopman tha në Bruksel se ky organ do t’u propozojë autoriteteve në Prishtinë listën e sanksioneve për mosrespektimin e kërkesës për deeskalim në veri të Kosovës.
“Sanksionet përfshijnë ndalimin e punës së organeve në kuadër të Marrëveshjes së Stabilizim Asociimit, ne do të pezullojmë planifikimin financiar për Kosovën dhe propozimet për investime për Ballkanin Perëndimor”, tha Koopman në një seancë të Komisionit për Politikë të Jashtme të Parlamentit Evropian (AFET).
Drejtori i Përgjithshëm i Sekretariatit të Përgjithshëm të Komisionit Evropian për Fqinjësi dhe Negociatat e Zgjerimit, Koopman, tha se për Kosovën do të ndërpritet mbështetja përmes procesit të prokurimit publik dhe nënshkrimit të kontratave të reja, si dhe vizitave të nivelit të lartë.
“Autoritetet e Kosovës nuk iu përgjigjën kërkesave të zyrtarëve të BE-së për hapat e mëtutjeshëm dhe për këtë, Komisioni Evropian do të vendosë sanksione të përkohshme”, tha ai, duke shtuar se ka pak shenja se kriza në veri të Kosovës do të deskalojë.
Deri më tani, sipas vlerësimeve nga Brukseli, janë bërë pak hapa që do ta kthenin Serbinë dhe Kosovën në tavolinën e bisedimeve. /tesheshi.com/
