Ministri francez i Ekonomisë, Emmanuel Macron, i gjendur në Moskë për një vizitë dyditore, i ka paraqitur në një dritë pozitive marrëdhëniet mes vendit të tij dhe Rusisë.
Pavarësisht sanksioneve perëndimore, Franca po punon për t’i forcuar marrëdhëniet me Rusinë, ka bërë të qartë Macron.
“Vizitat tona ministeriale nuk janë të përqendruara në diplomacinë, por tregojnë dëshirën e madhe për t’i ruajtur dhe forcuar marrëdhëniet tona diplomatike, duke i respektuar ndërkaq sanksionet në kornizën aktuale politike dhe diplomatike,” u ka thënë gazetarëve ministri francez i Ekonomisë pak pas takimit me homologun rus Alexei Ulyukayev.
Për të shtuar, “Eshtë shumë e rëndësishme për dy ekonomitë tona t’i intensifikojmë marrëdhëniet tona dhe të ecim përpara në mënyrë pragmatike.”
Macron deklaroi se shpresonte që sanksionet ndaj Rusisë të hiqeshin këtë verë me përmbushjen e marrëveshjes së Minskut.
Sanksionet ndaj Rusisë për shkak të krizës ukrainase u zgjatën nga BE-ja gjer në fund të korrikut të këtij viti. /tesheshi.com/
