Presidentja e Kosovës, Vjosa Osmani, ka përshëndetur vendosjen e sanksioneve amerikane ndaj anëtarit serb të Presidencës boshnjake Milorad Dodik.
“Një vendim vendimtar dhe shumë i nevojshëm u mor nga administrata amerikane. Përveç praktikave korruptive, Dodik kërcënoi në mënyrë aktive paqen, sigurinë dhe integritetin territorial të Bosnjë-Hercegovinës”, ka shkruar Osmani në Twitter.
Ajo e përshëndeti këtë vendim dhe u bëri thirrje partnerëve të tjerë ndërkombëtarë që të marrin masa të ngjashme.
Akti amerikan u përshëndet edhe nga ministri i Jashtëm i Maqedonisë së Veriut, Bujar Osmani. Ai komentoi shkurt vendimin e SHBA në Twitter, duke theksuar se Maqedonia e Veriut dënon çdo akt të cenimit të stabilitetit të Bosnjes.
“Ne mirëpresim vendimin e Departamentit të Thesarit të SHBA-së në lidhje me kërcënimet e vazhdueshme ndaj stabilitetit dhe integritetit territorial të Bosnjes. Maqedonia e Veriut mbështet sovranitetin dhe integritetin territorial të Bosnjës dhe dënon çdo akt që cenon stabilitetin dhe të ardhmen e saj euroatlantike”, tha Osmani.
Shtetet e Bashkuara zgjatën të mërkurën sanksionet kundër anëtarit të Presidencës trepalëshe boshnjake, Milorad Dodik. Ndryshe, kreu i serbëve të Bosnjes.
Departamenti Amerikan i Thesarit deklaron se sanksionet janë vendosur për shkak të aktiviteteve destabilizuese të Dodik, duke rrezikuar Marrëveshjen e Paqes të Dejtonit si dhe për korrupsion.
Sanksione u vendosën edhe ndaj Televizionit Alternativ të Banja Lukës për shkak të lidhjes së tij me Dodikun. Thuhet se ATV është një shtëpi private mediatike nën kontrollin e Dodik dhe familjes së tij.
Në anën tjetër, Departamenti Amerikan i Shtetit vendosi sanksione ndaj liderit të Lëvizjes për Veprim Demokratik (PDA) Mirsad Kukiq dhe ish-presidentit të Këshillit të Lartë Gjyqësor dhe Prokurorial (KLGJP) Milan Tegeltija dhe bashkëshortes së tij, Tijanës. Sanksionet e Departamentit të Shtetit kanë të bëjnë kryesisht me ndalimin e hyrjes në Shtetet e Bashkuara. /tesheshi.com/
