Me të mbaruar Europiani i Francës kanë nisur transferimet e para të atyre që u dalluan në fazën kulmore të tij. E një prej tyre është dhe Samuel Umtiti, qendërmbrojtësi i Francës, i cili luajti në tre prej ndeshjeve të aktivitetit.
Umtiti i është bashkuar Barcelonës për një shumë prej 25 milionë eurosh. Kontrata e tij është pesëvjeçare me klubin katalanas, me një klauzolë lirimi në shifrën 60 milionë euro.
Blerja e qendërmbrojtësit 22-vjeçar do të zyrtarizohet të premten, ndërsa ai do të kalojë më parë kontrollet mjekësore. Siç bëjnë të ditura mediat sportive spanjolle, ende nuk është i qartë vendi që ai do të ketë në ekipin e Luis Enrique-s.
Edhe pse mjaft i ri në moshë, ai qe pjesë e formacionit të parë të Francës në Euro 2016-tën në sfidat ndaj Islandës dhe Gjermanisë, për të luajtur e spikatur më tej në finalen ndaj Portugalisë.
Pesë vite më parë ai debutoi në radhët e skuadrës franceze të Olimpikut të Lionit, duke luajtur në 170 takime.
Umtiti qe thelbësor në sezonin e fundit për Lionin, duke ndihmuar në zënien e vendit të dytë në mbarim të kampionatit francez. /tesheshi.com/
