Komunikata e fundit e Samitit Islam në Stamboll, të mërkurën, i bëri thirrje botës të njohë shtetin e Palestinës me Jerusalemin Lindor si kryeqytetin e tij, duke theksuar se Shtetet e Bashkuara duhet të tërhiqen nga procesi i paqes.
Udhëheqësit e vendeve islame pjesëmarrëse, gjithashtu e konsideruan vendimin e Presidentit Trump mbi Jeruzalemin si “i papërgjegjshëm, i anuluar dhe i pavlefshëm”, duke sugjeruar që ajo vetëm nxit “ekstremizmin dhe terrorizmin”.
Presidenti palestinez Mahmud Abbas e përshkroi premtimin e Trump-it ndaj Izraelit lidhur me Jerusalemin, si Deklarata e dytë e Balfour-it.
Në hapjen e samitit të Organizatës së Bashkëpunimit Islam (OIC), ai shtoi se shpallja e “Jerusalemit si kryeqytet i Izraelit kërkon vendime për të mbrojtur identitetin e qytetit”, duke shtuar se “gjithë bota është me ne kundër vendimit të Trump-it”.
“Ne hedhim poshtë vendimet e njëanshme amerikane në lidhje me Jerusalemin”, tha ai. “Ne nuk do të pranojmë një rol amerikan në procesin e paqes pas sot”, duke shtuar se Uashingtoni ka tejkaluar linjën e kuqe në lidhje me statusin e Jerusalemit.
Abbas shtoi se: “Shteti i Palestinës nuk mund të krijohet pa Jerusalemin Lindor si kryeqytetin e tij … Ne nuk do të respektojmë marrëveshjet e mëparshme nëse Uashingtoni nuk tërheq deklarimet e tij të fundit”. Abbas bëri thirrje për një rezolutë të Këshillit të Sigurimit për të anuluar rezolutën e Trump në Jeruzalem.
Presidenti turk, Rexhep Tajip Erdogan tha se vendimi i Trump-it mbi Jerusalemin vjen si “një shpërblim për Izraelin për veprimet e tij terroriste”. Erdogan i bëri thirrje botës që të refuzojë vendimin e SHBA-së, duke thënë se do të ketë pasoja serioze.
Më parë, Ministri i Jashtëm turk tha në një takim të ministrave të jashtëm të OIC, se të gjitha vendet e tjera duhet të njohin shtetin palestinez dhe të luftojnë për të arritur këtë qëllim. “Ne duhet të inkurajojmë vendet e tjera të njohin një shtet palestinez bazuar në kufijtë e vitit 1967 me Jerusalemin Lindor si kryeqytetin e tij,” tha ai. /tesheshi.com/
