Milo Gjukanoviç ka qenë “ylli” i ditës së tretë të samitit të Asamblesë Parlamentare që u mbajt në Tiranë, në të cilin u “betonizua” aleanca anti-ruse e rajonit.
Kryeministri malazez, duke folur shkurt e shkoqur, tha nga Tirana se “ne nuk e dorëzojnë të ardhmen tonë në Moskë”.
Fjalim që shkaktoi duartrokitje dhe ovacion, duke e kthyer njeriun që ka 29 vjet që rri në pushtet në euroatlantistin më “trendy” të momentit.
Por provokacioni më i madh ka dalë nga goja e kryeministrit shqiptar Edi Rama, i cili ka akuzuar autoritetet e Shkupit se po ndjekin një “axhendë jugosllave” e cila sipas tij është e papranueshme për Shqipërinë, duke thënë se “kërkon mbrojtjen e të drejtës së shqiptarëve për të qenë komb shtetformues i shtetit.”
Edhe pse organizatorët e fshehën për të mos nxjerrë incidentin por atë që u vendos, delegacioni maqedonas ka bërë gati një protestë që pritet të bëhet zyrtare nga Ministria e Jashtme e Maqedonisë.
Kryeministri shqiptar Edi Rama, në fjalimin e tij kërkoi që Kosova të pranohet menjëherë në NATO dhe e paraqiti Malin e Zi si një partner të denjë të shqiptarëve.
Më pas, Rama e kaloi fjalën tek Shkupi, ku ka përmendur kushtin e Tiranës zyrtare për të miratuar hyrjen e Maqedonisë në NATO.
“Kemi punuar e do të punojmë që edhe Maqedonia të ankorohet në kursin euroatlantik. Eliminimi i trashëgimisë jugosllave në praktikën shtetërore mbetet parakusht për të ardhmen e atij vendi, për të cilin Shqipëria është e interesuar që të jetë sa më demokratik, sa më i begatë e sa më i bekuar. Besojmë në potencialin e Maqedonisë. Maqedonia ka mundësinë të projektojë të ardhmen e saj jo mbi formula arkaike të aritmetikave etnike e fetare, por mbi bazën e vlerave të mëdha të lirisë e progresit, si kusht për bashkëjetesën e qytetarëve të lirë.
Ngrirja e proceseve të pajtimit të brendshëm vetëm e shton nevojën për mbështetjen e fuqishme nga ana e NATO-s dhe Bashkimit Europian për Maqedoninë”, tha Rama.
Menjëherë pas këtij fjalimi, delegacioni maqedonas ka kërkuar replikë, por situata është kaluar me marifet nga organizatorët dhe nga kryetari i Asamblesë Parlamentare, që është kongresmeni republikan nga SHBA-së, Michael Turner.
Megjithatë, burime nga samiti bënë të ditur se diplomati maqedonas në asamble ka deklaruar se Ministria e Jashtme e vendit tw tij do të paraqesë së shpejti një notë zyrtare proteste në Ministrine e Jashtme shqiptare.
Në deklaratën finale të samitit të Tiranës theksohet se duhet “bashkim dhe vendosmëri nga vendet anëtare të NATO-s në luftën kundër terrorizmit dhe në marrëdhëniet me Rusinë”. /tesheshi.com/
