E premtja e 27 prillit do të mbetet ditë historike për gadishullin Korean. Lideri i Koresë së Veriut, Kim Jong Un dhe lideri koreano-jugor Moon Jae-in shtrënguan duart në kufirin ndarës mes dy vendeve.
Kështu, udhëheqësi i Koresë Komuniste bëhet lideri i parë i këtij vendi që shkel në Korenë e Jugut që prej fundit të Luftës Koreane, në vitin 1953.
Pas takimit në anën e Koresë Jugore, Kim Jong Un ftoi homologun e tij jugor që për pak çaste të kalonte kufirin drejt Veriut.
Ndryshimi i situatës së marrëdhënieve mes dy vendeve është kolosal, pasi vetëm pak muaj më parë tonaliteti mes shteteve ishte luftarak, ndërsa tani ata mund të diskutojnë paqen dhe armët bërthamore.
Pas ceremonive zyrtare, dy liderët hynë në Shtëpinë e Paqes në Panmunjom, një ndërtesë ushtarake në zonën e çmilitarizuar në kufi, ku Kim firmosi Librin e Miqve. “Tani fillon historia e re dhe epoka e paqes”, shkroi Kim Jong-un. Janë fotografitë që mbartin shumë simbolika.
Përgatiti: Juli Prifti – /tesheshi.com/
