Kancelarja gjermane Angela Merkel ka shpalosur qëndrimet e saj gjatë konferencës në Berlin, duke treguar në vija të trasha se cilat janë pritshmëritë nga takimit i sotëm.
Ajo ka bërë me dije se sot nuk ka asnjë vendim për çështjen Kosovë-Serbi por tha se “pret zgjidhje mes dy vendeve”.
Ajo gjithashtu tha se takimi i sotëm nuk ka të bëjë me zgjerimin e BE-së, por se po diskutohet perspektiva evropiane e vendeve të Ballkanit.
Ndërkohë, bashkëmikpritësi i Merkel, Emanuel Macron tha se Gjermania e Franca duan të tregojnë se është në interes të përbashkët që të shohin zhvillimin e Ballkanit.
Ai bëri me dije se takimi i sotëm është joformal dhe si i tillë në të s’do të flitet për çështje të hapura e të vështira.
“E kemi parë që ka mundësi të zgjidhjeve të mira siç është rasti i Greqisë dhe Maqedonisë së Veriut. Kjo ndodhë kur udhëheqësit kanë guxim”.
Çështja kryesore e diskutimit do të jetë Kosova dhe Serbia. Duam që këto vende t’a vazhdojnë dialogun. Nuk duam të imponojmë zgjidhje për Kosovën e Serbinë. Shpresojmë që gjatë rrugës të mos na shfaqen emocione, ndërsa tensionet duhen adresuar me kohë”, përfundoi Macron.
Mirëpo samiti i thirrur nga kancelarja gjermane Angela Merkel dhe Presidenti francez Emmanuel Macron i ka gjetur dy liderët kryesor të Kosovës me plot dallime.Thaçi dhe Haradinaj ka kohë që nuk po gjejnë dakordësi në çështje si dialogu me Serbinë dhe taksa mbi produktet serbe.
Për analistët, mosdakordësimi institucional mund të dëmtojë pozicionin e Kosovës në raport me pjesëmarrësit në këtë takim, por edhe në arenën e marrëdhënieve ndërkombëtare. /tesheshi.com/
