Kryetari i Skenderajt, Sami Lushtaku është marrë sërish nga Qendra Klinike Universitare e Kosovës, ku ishte duke u trajtuar për ta rikthyer sërish në burgun e sigurisë së lartë në Dyz.
Këtë e ka konfirmuar avokati i tij, Arianit Koci për tesheshi.com i cili ka thënë se Lushtaku është nxjerrë nga QKUK-ja pa lejen e ekipit mjekësor kujdestar, pa u ekzaminuar dhe pa rekomandim për terapi.
“Sami Lushtakun, sonte me urdhër të Gjykatës, e kanë marrë prej QKUK-së, pa lejen e ekipit mjekësor kujdestar, pa u ekzaminuar në tërësi dhe pa rekomandim për terapi. Realisht, ai as sonte nuk mundi të marrë terapinë. Krejt kjo është e cekur në fletëlëshim. Madje, edhe fletëlëshimi është kryer pas daljes se pacientit nga klinika. Kjo është ne kundërshtim me ligjin dhe çdo etikë mjekësore dhe humane. Lushtakut po i shkelet një e drejtë elementare, e drejta në trajtim mjekësor”, ka thënë Koci për tesheshi.com.
Sami Lushtaku ishte shtruar në QKUK pas gjendjes se rëndë shëndetësore dhe grevës disaditëshe në burg, për shkak moslejimit për trajtim të duhur mjekësor.
Ish-komandanti i UÇK-së për Zonën Operative të Drenicës, tashmë kryetar i Skenderajt, si pjesë e procesit gjyqësor “Drenica”, është dënuar me 12 vjet burg nga Gjykata Themelore e Mitrovicës për vrasjen e një civili shqiptar, identiteti i të cilit nuk dihet./tesheshi.com/
