Milani nuk arrin të mbajë ritmin e Juventusit dhe Napolit në Serinë A dhe humbet në ndeshjen e drekës kundër Sampdorias, 2-0.
Skuadra e Montelës ka zhvilluar ndoshta ndeshjen më të keqe që nga nisja e sezonit, duke u dominuar nga kundërshtari në mesin e fushës. Që në fillim të lojës, Zapata dhe Ramirez vunë në provë Donarumën, i cili megjithatë tregoi se është portieri i sa ardhmes në Itali.
Megjithatë ndeshja e luajtur në Xhenovë, përveç dy gjuajtjeve, nuk shënoi raste të tjera dhe kalimi i minutave dëshmoi ekuilibër në fushë.
Por “dorianët” e nisën më të vendosur pjesën e dytë, duke e vënë në vështirësi portierin Donaruma. Duhej të vinte minuta e 67-të, kur sulmuesi kolumbian Zapata të shënonte golin e parë.
Edhe pas golit, Milani nuk mundi të vihej në zotërim të mesfushës dhe lojtarët e trajnerit Xhampaolo, thyen cdo aksion sulmues. Edhe hyrja e sulmuesit Kutrone nuk solli ndonjë ndryshim në lojë. Pikërisht në fund të saj, në minutën e 90-të, mesfushori Alvarez preu çdo shpresë për milanezët për të dalë me pikë nga ndeshja, duke shënuar golin e dytë.
Kështu Milan mbetet pas në klasifikimin e përgjithshëm, në një kohë kur Juventus e Napoli, por edhe Roma, vijojnë të fitojnë. /tesheshi.com/
