Mohamed Salah nuk ka të ndalur. Eshtë sezoni i tij, është momenti i tij!
Një tjetër paraqitje e shkëlqyer të martën, ndaj Romës, ish-skuadrës. Dy gola, dy pasime për gol… Liverpuli ia dedikon Salah-ut fitoren 5-2!
Egjiptiani po magjeps një Europë të tërë me golat e tij. Në “Anfield” është heroi, në Angli është më i miri, në kontinent është nga më të shkëlqyerit.
“Lojtar fenomenal,” është një reagim pas ndeshjes ndaj Romës. “Lëreni çmimin si lojtari i vitit, jepini atij Topin e Artë!”
I tërë shtypi sportiv europian ka vetëm Mohamed Salah-un në tituj. “Pa asnjë dyshim, ai është lojtari më i mirë në planet tani,” deklaron Steven Gerrard, ish-kapiteni i Liverpulit.
Për Jurgen Klopp-in, Salah është një lojtar i klasit botëror. “Goli i tij i parë është një goditje gjeniale,” thotë tekniku gjerman pas fitores ndaj Romës në gjysmëfinalen e Champions League-s.
“Salah është ylli që i mungon La Ligës,” lexohet në një opinion të shkruar shpejt për një të përditshme sportive spanjolle.
Ai ka shënuar 43 gola këtë sezon në 47 ndeshje të luajtura; vetëm Ian Rush ka shënuar më shumë, 47 gola, në një sezon të vetëm për Liverpulin.
Dhjetë janë golat e Salah-ut në Champions League këtë sezon, si asnjë futbollist tjetër i Liverpulit në një sezon të vetëm të këtij aktiviteti.
Po ashtu ai është i pari lojtar afrikan në histori që shënon më së paku nëntë gola në një sezon në dy aktivitetet europiane të klubeve.
BBC-ja i rezervon një hapje interesante raportimit të saj për takimin mes Liverpulit dhe Romës, duke nisur nga titulli: “Salah e vendos veten mes elitës së futbollit europian. Mohamed Salah u kurorëzua në fundjavë lojtari më i mirë i Anglisë. Të martën e vendosi veten si një prej më të mirëve të Europës. Hapi tjetër: bota?”
Salah ka mbi 17 milionë ndjekës në median sociale, por magjepsjen pas tij, posaçërisht të tifozëve të Liverpulit, e ilustron shumë më mirë diçka tjetër, tepër më domethënëse. Duke cituar shkrimin në “Marca”, “Në Liverpul, ku Krishterimi është mbizotërues, ka një këngë që thotë, ‘…nëse vazhdoni të shënoni gola, unë po ashtu do të bëhem musliman…’”. /tesheshi.com/
