Pas një seri përgjimesh të publikuara nga gazeta Dita mbi dosjen hetimore të aferës politike “Babale”, e cila është vërtetuar tashmë dhe me vendim gjykate si një sajesë, ish-mininisti i Brendshëm Fatmir Xhafaj, njeriu i shënjestruar për t’u goditur nga biseda e pretenduar mes vëllait të tij Agron Xhafaj dhe shtetasit Agim Veliu (Babale), kërkon që Salianji, njeriu kryesor pas kësaj afere, të shkojë pas hekurave.
“Gjithçka nisi mbi të dhëna false, vijoi të shfrytëzohet politikisht nga njerëz fals dhe u besua po nga ata individë fals që e krijuan atë. Të jem i sinqertë edhe pas vendimit sërish nuk jam krejtësisht i qetë, pasi fatkeqësisht kuptoj se kur një grusht gënjeshtrash politike depërtojnë në jetën e një ligjvënësi dhe për më tepër në funksionin e ministrit të Brendshëm, imagjino se çfarë ka ndodhur me qytetarët e zakonshëm të cilët shpeshherë ndeshen me pasojat që prodhon politika e baltës, shpifjeve e fyerjeve.
Që në datën 14 maj 2018 ne kemi këmbëngulur në pavërtetësinë e atij audio-regjistrimi montazh dhe kemi kërkuar që kjo të çertifikohet ligjërisht dhe të ndëshkohet. Ndëshkimi apo edhe burgimi i personave fajtorë nuk është ajo që çliron shpirtin tonë në këtë rast, por çdo ndëshkim ka vlerën e vet edukuese dhe shpresoj që edhe me kaq procesi ta ketë bërë punën e tij, të ketë dhënë mesazhet e duhura njerëzore dhe politike”, thotë ish-ministri Xhafaj në një intervistë për Dita-n.
Për Xhafajn, është e rëndë që një parti që aspiron të qeverisë, të synojë pushtetin me të tilla forma.
“E bën të dhimbshëm, të pamoralshëm dhe të pisët këtë proces, fakti që për tshkatërruar imazhin e kundërshtarit tënd politik, për ta shantazhuar atë në funksionin e tij shtetëror, angazhohen përmes fabrikimit të provave të rreme strukturat e një partie politike që synon të qeverisë vendin”, shprehet njeriu që u godit rëndë politkisht nga ajo çfarë ndodhi.
Xhafaj thotë se për asnjë moment nuk ka dyshuar se zëri në audiopërgjimin e publikuar të jetë i vëllait të tij.
“Nuk pata asnjë dyshim për falsitetin e atij audio-regjistrimi të bërë publik nga PD-ja, që në momentin e parë që e dëgjova. Ishte e qartë që zëri nuk ishte i tim vëllai.
Është thjesht një film politik i ideuar, zhvilluar dhe montazhuar në çdo element të tij, në zyrat e SHQUP-it ku nën drejtimin e Lulzim Bashës dhe zbatimin e një aventurieri politik, u bë e mundur të kënaqet përkohësisht, veç një rreth i ngushtë që sot është edhe më i vogël. Edhe sikur ai audio-regjistrim të konsiderohej real qoftë edhe për një moment të vetëm, nuk ka asnjë provë apo fakt që implikon në asnjë aferë kriminale vëllanë tim, e jo më pastaj mua”, shprehet paraardhësi i Sandër Lleshajt.
Kujtojmë se afera “Babale” shpërtheu më pak se dy vite më parë. Krerë të PD-së dolën në një konferencë për shtyp duke pretenduar se kishin në dorë një audiopërgjim kompromentues për të vëllanë e ministrit të Brendshëm, por që kohë pas kohë doli të ishte një sajesë.
Gjithsesi, kjo çoi në dorëheqjen e Xhafajt si ministër Rendi. /tesheshi.com/
