E shndërruar në mit – hapja e listave – një kërkesë e opozitës së re si kusht për të votuar marrëveshjen për Reformën Zgjedhore, ka marrë një “Jo” nga PD, e kjo në kohën kur PS thotë se është e gatshme ta diskutojë nëse është dakort selia blu.
“OSBE/ODIHR ka konfirmuar se ndryshime të tilla nuk mund të ndodhin një vit para zgjedhjeve”, thuhet në një deklararë të PD.
Ndërkohë, edhe pse Rama është ulur të negociojë me zëra nga opozita e re (eksponentë të listës “Basha”), me qëllim që të marrë prej tyre dakortësinë për të votuar marrëveshjen, PD sheh aty, si gjithnjë, një komplot nga Rama.
“Hapja në këtë moment, e diskutimit për sistemin zgjedhor është vetëm alibi e Edi Ramës për të vonuar kodifikimin në parlament të dakortësisë së 5 qershorit, që është një kërkesë e Sekretarit Amerikan të Shtetit, Mike Pompeo, si dhe 1 nga 15 kushtet për nisjen e negociatave të anëtarësimit me BE.
Çdo veprim i njëanshëm në këtë drejtim do të përbënte prishje të marrëveshjes konsensuale të 5 qershorit, me pasoja për vendin dhe të ardhmen europiane të Shqipërisë“, deklaron PD-ja.
Ndërkohë, Rama, jo më larg se dy ditë më parë, deklaroi se nuk mund të marrë asnjë vendim, siç ja kërkon opozita e re, pra për hapje listash, e cila do çonte në cenimin e marëëveshjes me PD. /tesheshi.com/
