Gazetari francez i RMC Daniel Riolo ofroi lajmin e bujshëm në lidhje me klubin e ri të Lionel Messi në sezonin e ardhshëm, pasi i përfundon kontrata me Barçën, me të cilën, siç është bërë e ditur, ka një raport nga dashuria në urrejtje.
Kujtojmë se gjatë verës Messi tronditi botën e futbollit duke kërkuar të largohej nga Barcelona, gjë që klubi, të paktën përkohësisht, e parandaloi me sukses. Të paktën deri në verën e ardhshme kur ai do të ketë të drejtën të largohet nga Camp Nou pa dëmshpërblim, si një agjent i lirë.
Spekulohet gjerësisht se Manchester City duhet të jetë klubi i tij i ri, një kthim nën kujdesin e trajnerit të tij të preferuar Pep Guardiola, por radio franceze RMC pretendon të kundërtën dhe deklaron se argjentinasi i madh do të vazhdojë karrierën e tij në Paris Saint Germain.
“Lionel Messi do të jetë në PSG vitin e ardhshëm. Unë jam serioz. Messi do të jetë në PSG,” tha Riolo dhe, natyrisht, çmendi tifozët e kampionëve francezë.
Nuk ka dyshim se PSG mund të plotësojë të gjitha kërkesat financiare të Messit.
Ndërkohë, Neymar e paralajmëroi diçka të tillë kur dy ditë më parë deklaroi se sezonin e ardhshëm do luajë krahpërkrah Messit. /tesheshi.com/
