Në fillim kryeministri Rama, e më pas Policia e Shtetit, e kanë quajtur si “skandaloz” një të dhënë në RAI 3, sipas të cilit kultivimi i kanabisit në Shqipëri është 12-fishuar. Për Ramën, do mjaftonin të dhënat e Guarda di Finanza-s, e cila bën monitorimin e territorit shqiptar.
“Lajmi i mbrëmshëm në RAI 3 mbi gjoja 12 fishimin e kultivimit te kanabisit në Shqipëri është një turp gazetaresk, pa asnjë lidhje me realitetin e monitoruar dhe certifikuar nga vetë Guardia di Finanza! Uroj që partnerët tanë të shkëlqyer ta thonë vetë pa humbur kohë të vërtetën!”, shkruan Rama.
Ndërsa nga Rendi thuhet se “viti 2019 shënoi sasinë më të vogël historike të kanabisit me origjinë nga Shqipëria të kapur në Itali, duke provuar kështu suksesin e madh dhe të padiskutueshëm të luftës tonë në këtë front”.
“Në emër të të gjithë trupave tona të angazhuara në ketë betejë të shtetit dhe ligjit me antishtetin dhe antiligjin, ne shprehim keqardhjen e thellë dhe indinjatën legjitime për lajmin e rremë të transmetuar mbrëmë nga kanali prestigjioz
RAI 3, ku dezinformimi mbi kultivimin e kanabisit në Shqipëri ishte skandaloz.
Drejtori i Përgjithshëm e ka përcjellë menjëherë shqetësimin e krijuar nga ky lajm tek partneret italianë dhe ka kërkuar prej tyre saktësimin e këtij informacioni pa asnjë bazë, i cili ka krijuar terren për spekulime politike dhe mediatike edhe në Shqipëri.
Partnerët italianë janë shprehur të habitur me lajmin në fjalë dhe kanë konfirmuar se ky lajm nuk bazohet në asnjë burim të drejtpërdrejtë informacioni të verifikuar”, thuhet në reagim. /tesheshi.com/
