Kryeministri Rama reagoi në lidhje me rihapjen e debatit mbi kufijtë detarë me Greqinë, pas ratifikimit në parlamentin grek të 12 miljeve më tepër në Jon. Kujtojmë se nga zëra opozitarë, kjo është shfrytëzuar për krjimin e idesë se “Rama po ia shet detin Greqisë”.
Ky i fundit shkruan në më të fundit reagim: “Llumi nacional-folklorik i politikës shqiptare pa kufij, pa din e iman, është derdhur sërish në oqeanin digjital përmes shpifjes së madhe të ‘shitjes së detit’ Greqisë!
Këtë marrëzi ekstreme për përfitime politike mund ta besojnë vetëm ata që s’duan të dëgjojnë e as të kuptojnë!
Jetojmë në shekullin XXI dhe në mes të Europës,ku nuk mund të ‘shiten’ e ‘blihen’ dot dete e territore as fshehurazi, as haptazi nga asnjë autoritet i veçantë!
Këto mund të ndodhin vetëm në batakun e ligësisë e të injorancës, ku llumi i shqiptarisë gjen shesh për përsheshin e tij!”.
Dhe për të qenë konkret dhe ilustrativ në atë që shpjegon, Rama ofron dokumentin e provës se si Shqipëria ka bërë të njëjtën gjë vite më parë.
“Ja edhe dokumentat e vitit 1990 kur Shqipëria bëri fiks këtë që bëri Greqia sot dhe që është në fuqi sot e gjithë ditën në regjistrin e OKB! As pala greke s’kishte çfarë kontestonte atëherë as ne s’kemi ne çfarë kontestojmë tek vendimi i Greqisë! Lëreni llumin në batakun e vet...”, shkruan Rama. /tesheshi.com/
