Opozita dhe mazhoranca në Shqipëri janë “kacafytur” sot me akuza dhe kundërakuza për shkak të një ndërtimi nga ana e deputetit socialist, Sadri Abazi, tip “shtese kati”, që për opozitën është e paligjshme.
“Sadriu i Ramës po vazhdon të përfundojë edhe katin shtesë në pallatin e tij në zemër të Tiranës dhe Edi Rama, jo vetëm që e lejon, ndalon ligjin të funksionojë, por del dhe e mbron publikisht përmes dallëndyshes së INUK-ut, drejtoreshës kukull të Ergys Hoxhës, i cili drejton operacionin kriminal dhe korruptiv të blerjes së votës në Dibër”, ka thënë Zhupa, e cila ka publikuar ka publikuar edhe një dokument, që përmban sipas saj vendimet për prishje objekti të pallateve të Abazit, sepse janë ndërtuar pa leje.
“Edi Rama vetë kur ishte kryetar bashkie ka nxjerë vendim për prishjen e pallateve. Bashkia Tiranë, vendim për prishje objekti, 17.02.2010”, ka saktësuar zëdhënësja.
Por ndërkohë, ka reaguar kryeinspektorja e IKMT, Dallëndyshe Bici, sipas së cilës PD-së i ka mbetur vetëm balta.
Është qesharake që sot Partia Demokratike pretendon se paska një vendim prishjeje për një pallat në vitin 2010. Ndërkohë që zoti Basha, autori i çarçafit të baltës që ishte kryetar bashkie nga viti 2011 deri në vitin 2015, jo vetëm nuk e paska ekzekutuar këtë vendim, por tani më akuzon mua për një objekt të legalizuar sipas ligjit dhe ku po kryhen punime me dokumentacion ligjor”, shton Bici.
Ajo thotë më tej se, “IKMT ka kryer detyrën edhe pas denoncimit të zotit Basha, ashtu si të çdo qytetari dhe ka rezultuar se pretendimi i ish-kryetarit të bashkisë nuk ka asnjë bazë ligjore”, përfundon znj. Bici. /tesheshi.com/
