Armando Sadiku jep sinjale të forta se mbetet në kontakt me golin, në prag të ndeshjeve eleminatore për Botërorin Rusi 2018 që kombëtarja shqiptare do të luajë.
Sulmuesi ka shënuar një gol të rëndësishëm në fitoren “e vuajtur” që ekipi i tij Legia e Varshavës ka arritur ndaj Zaglebie, skuadër që në javët e para kryesonte kampionatin polak.
Bomberi shqiptar ishte ai që çeli serinë e golave, pas një gjuajtjeje të saktë brenda zonës, duke e çuar topin në një pikë të pakapshme për portierin kundërshtar, në trekëndësh. Legia më pas shënoi edhe një gol të dytë, për të mbetur më pas me 10 lojtarë, e për të pësuar një gol nga kundërshtari.
Me fitoren e rëndësishme të së dielës, Legia e Varshavës ngjitet në vendin e dytë në kampionat, me një pikë diferencë nga kryesuesja Lech Poznan.
Armando Sadiku, pavarësisht nëse luan në formacion apo hyn nga stoli, dëshmon se është gjithnjë gati, të shënojë e krijojë, ashtu siç bëjnë sulmuesit e zonës sot./tesheshi.com/
