Vendimi i djeshëm i Gjykatës s Tiranës që dënoi ish-kryeministrin Sali Berisha me afro 1 mijë euro dëmshpërblin ndaj Carlo Bolinos, botuesit italian të një grupi mediatik shqiptar, është komentuar në mënyra krejt të kundërta nga politika shqiptare.
Taulant Balla e ka cilësuar si thyerje e një tabuje, pasi sipas kreut të grupit të PS-së, për herë të parë në 27 vjet, një gjykatë guxon e të marrë një vendim ndaj Sali Berishës.
Ndërkaq, opozita e cilëson si dëshmi thelbësore e kapjes së drejtësisë nga Edi Rama.
Vetë Bollino, në një editorial të tij thekson se vendimi duhet të jetë një mundësi që të ndalet lumi i akuzave dhe helmit pa “doganë”.
“Vendimi që e dënoi Sali Berishën për shpifje ndaj meje, pikërisht për këtë arsye është historik: pasi për herë të parë në jetën e tij, ish-presidenti dhe ish-kryeministri i vendit e kupton që ligji i njerëzve të zakonshëm tani vlen edhe për të, kështu që akuzat personale dhe dixhitale që lëshon ndaj të gjithëve, tani duhet edhe të provohen. Dhe, nëse deri tani për të ka qenë e lehtë të bënte politikë duke ofenduar këdo dhe duke shpifur ndaj kujtdo, nga sot e tutje duhet ta dijë se gjyqtarët e këtij vendi janë të gatshëm madje edhe ta dënojnë.
Pra, nuk jam vetëm unë ai, që them se ato ishin shpifje, as institucionet italiane dhe ndërkombëtare, që, në 35 vite karrierë gazetareske, kanë certifikuar ndershmërinë time. Prova e pafajësisë sime është pikërisht Doktori, i cili, edhe pse u bë gjykatës dhe prokuror, nuk ishte asnjëherë në gjendje të faktojë akuzë”, shkruan Bollino.
Bledian Koka, një gazetar mjaft pranë opozitës dhe që shkruan shpesh kur akuzohet djali i ish-kryeministrit, i ka “qendisur një kundërpërgjigje Bollinos ku shkruan se Sali Berisha gjithsesi nuk e ka shkruar të gjithë të vërtetën.
“Praktikisht Sali Berisha, ose eshte denuar per shkak se ne akuzen e tij ka ngaterruar njeren mafie me tjetren, ose eshte denuar se s’ka treguar krejt te verteten ne publik. E para dua te besoj qe eshte e vertete. Te dyten e di mire qe Sali Berisha nuk flet kurre kot. Sa per biznesmenin qe fshihet nen lekuren e gazetarit sa here ia do nevoja, kjo minimalisht eshte e pandershme”, shkruan Koka.
Deri dje, të vetmit politikanë të dënuar nga gjykata për shpifje, pasi kishin hedhur akuza në publik, ishin Taulant Balla dhe Saimir Tahiri.
Ata u dënuan në vitin 2012, në kulmin e pushtetit të PD-së, pasi akuzuan vajzën e Berishës dhe të birin e tij se përfitojnë nga pushteti i Kryeministrit.
Ndërkohë kur PD-ja doli në opozitë, ish-kryeministri Sali Berisha u kthye në një akuzator bruto, pa inventar, ku çdo ditë transmeton ankesa dhe akuza pa doganë në faqen e tij të rrjetit social.
Sot, vërtet u vendos një precedent, pasi për herë të parë u dënua nga një gjykatë një prej 3 më të fuqishmëve në vend.
Dhe ky precedent është një shans, madje ka gjasa që të vendosë një standard për politikën: që kur akuzon të jetë e kujdesshme se ç’nxjerr nga goja.
Dhe çështja shtrohet: përse dy njerëz jashtë politikës, Agron Xhafa dhe Olsi Rama, nuk ngrejnë padi ndaj akuzave që lëshohen ndaj tyre? Afërmendsh që vëllezërit respektivë në krye të pushtetit, ashtu si dhe ata, kanë vendosur t’i “hajnë akuzat me bukë”, të kompleksuar ndoshta nga fakti, që si në rastin e Bolinos, do akuzohen për kapje të drejtësisë. Ose ose, është teza e Ramës se njerëzit nuk janë budallenj dhe dijnë ta japin gjykimin. Por vetë Olsi Rama e Agron Xhafaj, nëse nuk janë vërtet ata që i vizaton opozita, duhet të jenë pa mish e gjak sa t’u bëhet dinjiteti qepaze me akuza, pa marrë mundimin të shkojnë në gjykatë. Pas Bolinos duhet ta bëjnë dhe ata…dhe të gjithë ata, nga njëri krah apo tjetri, që ballafaqohen me akuza. Eshtë një formë edhe për ta përmirsuar drejtësinë. /tesheshi.com/
