Sa qesharake aq edhe turpëruese: Real Madrid eliminohet nga Kupa e Mbretit

Real Madridi është jashtë garës së Kupës së Mbretit, përkundër triumfit në udhëtim ndaj skuadrës Cadiz (1-3).

Autori i golit të parë, Denis Cheryshev nuk është se i ndihmoi edhe aq shumë mbretërve, pasi me inkuadrimin e tij ata humbasin duelin në tavolinë, për shkak se i njëjti futbollist kishte mbërritur limitin e kartonëve të verdhë sezonin e shkuar në kuadër të kupës, ndaj  dhe ishte i suspenduar për këtë takim.

Faktin e kanë zbuluar mediat spanjolle, që e kanë raportuar në kohë reale, aq sa në Cadiz ka plasur gallata, me thirrjet: “Shih internetin, Benitez”, “Kampionët jemi ne” dhe shumë shaka tjera.

“Klubi nuk dinte asgjë për statusin e pezullimit të Cheryshev. As Cheryshev e askush nuk ka raportuar tek ne. Ne e futëm në fushë atë me besim të plotë tek ai”, ishin fjalët e teknikut madrilien, Rafael Benitez, i cili ishte i dëshpëruar nga e gjitha kjo histori./tesheshi.com/