Të dëshpëruar deri në dhembje për moskualifikimin e Italisë në Botërorin e vitit të ardhshëm, mediat e këtij vendi kanë gjetur një spirale shprese, për të mbajtur në mos gjallë, të paktën në vdekje klinike, shpresën për të shkuar në Rusi.
Sipas tyre, qenka një nen me numrin 7 në rregulloren e FIFA-s, i cili thotë se: “Në rast se një kombëtare e kualifikuar në Botëror vendos të tërhiqet, ose pezullohet nga autoriteti i FIFA-s, atëherë do t’i lihet hapësirë institucionit, t’a zëvendësojë më një ekip tjetër”.
Pikërisht tek kjo “fije floku” janë kapur njerëzit në Itali, kjo edhe për faktin se është kjo kombëtare që edhe pse luajti në fazën play-off, ka grumbulluar më shumë pikë se sa kombëtaret e tjera dhe në këtë situatë, janë “axurët” ata që përfitojnë. Të përjashtojë ndonjë kombëtare FIFA vallë, apo do tërhiqet dikush? Nuk i dihet kurrë. Shpresa vdes e fundit…dhe këtë po e besojnë fort këto ditë në Itali. /tesheshi.com/
