Nga Entela Canaj
Dita e parë e shkollës në Shqipëri më shumë se një ditë mësimi ngjan me një ditë feste, ku nxënësit vijnë pa çanta në shkollë dhe qëndrojnë më së shumti në kafe duke treguar për pushimet e verës.
Sidomos te gjimnazistët kjo është me evidente. Ndërsa i pyet të tregojnë se më shumë para shpenzojnë për veshjet se sa për librat. Jo vetëm vajzat por edhe djemtë kërkojnë të vishen bukur dhe sipas modës dhe për këtë shpenzojnë mjaft para nga ‘koka te këmbët’.
Uniformat nuk përdoren më, ose në të rrallë i sheh te ndonjë shkollë private apo të nxënësit e vegjël që binden më lehtë për të përdorur përparësen e zezë. “Kemi shpenzuar për ditën e parë por jo në ekstrem. Librat më kanë kushtuar 40 mijë lekë ndërsa veshja 60 mijë lekë (të vjetra). Edhe akoma nuk i kam mbyllur librat sepse mungojnë dy tekste,” thotë Fiona, gjimnaziste në Tiranë.
Ndërsa Ester, maturante te ‘Ismail Qemali’, thotë se shpenzon goxha për tu veshur, për ditën e parë ka blerë afro 100 mijë lekë gjëra. “Tani ne vajzat jemi pak të apasionuara pas rrobave, sa shohim diçka në dyqan kërkojmë ta blejmë, unë shpenzoj, jo vetëm ditën e parë por gjatë gjithë vitit. Megjithëse nuk i paguajmë, ne i paguajnë prindërit ne vetëm zgjedhim.”
Por edhe më të vegjlit kanë shumë shpezime, sipas një vëzhgimi që ne bëmë paketa e librave për arsimin parauniversitar varion nga 16 mijë lekë deri në 55 mijë lekë. Nëse llogarisim këtu, edhe çantën që kushton mesatarisht 20 mijë lekë, një palë atlete 20 mijë lekë, xhinset 25, dhe një t-shirt 20, një prindi dita e parë e shkollës i kushton mbi 100 mijë lekë të vjetër,e nëse ka 2 apo tre fëmijë në shkollë, ku pra dita e parë e shkollës i merr gjithë rrogën e një muaji.
Ndërkohë, krahas nxënësve, edhe mësueset janë kujdesur për veshjen e ditës së parë, sidomos në shkollat në qendër të Tiranës, ku pritën vizita edhe nga krerët e shtetit.
Referuar statistikave të Ministrisë së Arsimit janë rreth 490 mijë nxënës të arsimit 9-vjeçar dhe atij të mesëm që nisën sot vitin e ri shkollor 2015-2016, ndërsa 30 mijë vogëlushë do të ulen për herë të parë në bankat e shkollës.
Po sipas Ministrisë së Arsimit dhe Sportit, janë 18 shkolla të reja të përfunduara, që do të shfrytëzohen për vitin e ri shkollor. Megjithatë, në kryeqytet mësimi do të vijojë të zhvillohet me turne, duke mos zgjidhur problematikën shumëvjeçare. /tesheshi.com/
