Genta Sula, kryetare e Autoritetit të Dosjeve thotë se një numër i madh individësh që kanë qenë ish-bashkëpunëtorë të Sigurimit vijojnë punën edhe sot.
Në “Now” në Euronews Albania, Sula u shpreh se shifra e fundit e raportuar nga institucioni që ajo drejton është se 78 ish-bashkëpunëtorë të sigurimit ende vijojnë detyrën, pasi siç shpjegoi Autoriteti vetëm jep informacione institucioneve dhe ato vendosin çfarë të bëjnë me punonjësit e tyre.
“Numri i fundit që kemi raportuar ka qenë 78. Kemi thënë dhe më parë që nuk është bërë verifikimi për të gjithë, vetëm një pjesë e vogël. Ne nuk i ndjekim dot ata, ja japim informacionin institucioneve dhe institucionet vendosin vetë se çfarë bëjnë. Në disa institucione ka nene lustrative. Shërbimi i Jashtëm Diplomatik e ka të papajtueshëm qenien pjesëtar i shërbimit nëse ke probleme me sigurimin e shtetit, nëse je agjent i fshehtë”, tha Sula.
Por a ka patur zhdukje dosjesh?
Ajo tha se janë asgjësuar gjatë ndërrimit të sistemeve dosjet e atyre personave që i përkisnin krimeve politike dhe nuk u quajtën më krime politike.
Megjithatë, Sula bëri me dije se ka 2.2 kilometra materiale që mundësojnë realizimin e ligjit, pra njerëzit informohen për çfarë ka dhe çfarë jo.
Sipas saj, informacionet në dispozicion tregojnë dhe mënyrën se si ka funksionuar Sigurimi i Shtetit.
Kujtojmë se cështje e dosjeve të sigurimit të shtetit është rihapur sërish, pas faktit të aluduar se politikani i lartë I. M. – (Ilir Meta(j) – ka qenë ish-spiun Sigurimi. /tesheshi.com/
