Ngjitja në malin më të lartë në botë së shpejti mund të bëhet më e shtrenjtë pasi Ministria e Turizmit e Nepalit po shqyrton rritjen e tarifave që alpinistët e huaj duhet të paguajnë për t’u ngjitur në malin Everest.
Tarifa aktuale prej 11,000 dollarësh do të rritet në 15,000 dollarë në sezonin e pikut të ngjitjeve pranverore. Rritja e çmimit duhet të miratohet nga Këshilli i Ministrave përpara se të hyjë në fuqi në vitin 2025, tha zëdhënësi.
Mali Everest ndodhet në kufirin e Nepalit dhe Kinës, dhe mund të aksesohet nga alpinistët nga të dy vendet. Leja e ngjitjes është më e shtrenjtë në anën kineze.
Që kur Tenzing Norgay dhe Edmund Hillary u ngjitën për herë të parë në malin Everest në 1953, janë regjistruar rreth 11,500 ngjitje. Vitet e fundit, interesi për ngjitjen e malit Everest është rritur.
Administrata e turizmit në Nepal tha se rritja e çmimit të lejeve duhet të kishte ndodhur më herët. Çmimet janë rregulluar për herë të fundit në vitin 2015.
Përveç tarifave të lejes, ka edhe shumë kosto të tjera për alpinistët e huaj, duke përfshirë pajisjet, rezervuarët e oksigjenit, fluturimet e brendshme, akomodimin, ushqimin dhe një ekip lokal mbështetës.
Në total, një alpinist mund të presë të paguajë midis 30,000 dhe më shumë se 100,000 dollarë për përpjekjen. /tesheshi.com/
