Pa një furnizim me gaz rus, ekonomia gjermane do të pësonte dëme të mëdha, të cilat duhet të shmangen nëse është e mundur, thotë gjiganti energjetik E.ON.
Do të duhen tre vjet që Gjermania të organizojë furnizime alternative me gaz për t’u bërë e pavarur nga gazi nga Rusia, tha shefi ekzekutiv i gjigandit gjerman E.ON, Leonhard Birnbaum.
“Ne kemi vlerësuar se kjo do të kërkonte një periudhë prej tre vjetësh,” tha ai për mediat gjermane, kur u pyet se sa shpejt Gjermania mund të shpëtojë nga gazi rus, raportoi Reuters.
“Pa një furnizim me gaz rus, ekonomia gjermane do të pësonte dëme të mëdha, të cilat duhet të shmangen nëse është e mundur,” shtoi ai.
Ai gjithashtu paralajmëroi për efektet anësore për shkak të mungesës së komponentëve dhe lëndëve të para në industri të ndryshme të mëtejshme.
Në një takim të liderëve të Bashkimit Evropian të premten, nuk pati një qëndrim të përbashkët për kërkesën e javës së kaluar nga Rusia që vendet “armike” duhet të paguajnë për gazin e tyre në rubla, jo në euro.
Kjo ndodhi pasi Shtetet e Bashkuara dhe aleatët evropianë bashkuan forcat për një seri sanksionesh që synonin Rusinë për pushtimin e saj në Ukrainë. /tesheshi.com/
