Për Kupën e Botës në Katar, deri më tani janë shitur 2.45 milionë bileta dhe më shumë se 500.000 prej tyre janë blerë gjatë periudhës 5 deri më 16 korrik, njoftoi të enjten Federata Botërore e Futbollit (FIFA), transmeton Reuters.
Sipas raportit të FIFA-s, numri më i madh i biletave është shitur për ndeshjet e fazës së grupeve: Kamerun – Brazil, Brazil – Serbi, Portugali – Uruguai, Kosta Rika – Gjermani dhe Australi – Danimarkë.
“Tifozët që jetojnë në Katar, Arabinë Saudite, Shtetet e Bashkuara të Amerikës, Meksikë, Emiratet e Bashkuara Arabe, Angli, Argjentinë, Brazil, Uells dhe Australi janë blerësit më të shumtë të biletave”, njofton shtëpia botërore e futbollit.
Fillimi i saktë i fazës së fundit të shitjes së biletave online do të shpallet në fund të shtatorit. Në të njëjtën kohë me fazën e fundit të shitjeve “online”, në Doha do të nisë edhe shitja e biletave në pikat e shitjes.
Botërori do të nisë një ditë më herët se sa ishte planifikuar fillimisht, ndaj më 20 nëntor, pas ceremonisë së hapjes, do të zhvillohet ndeshja e parë nga skuadra mikëpritëse(Katari) kundër Ekuadorit.
Është Botërori i parë që mbahet në Lindjen e Mesme dhe zhvillimi është zhvendosur në nëntor dhe dhjetor, në vend të qershorit dhe korrikut të zakonshëm, për të shmangur vapën e verës në zonë. /tesheshi.com/
