Nëse të kap Policia Rrugore me shkelje dhe ti mendon se mund t’ja hedhësh duke i dhënë ryshfet, mundet të jesh duke luajtur një ruletë ruse. Kjo pasi mund të të presin prangat. Këtë fat ka patur një drejtuese femër që sipas pamjeve nga Policia e Shtetit, ka tentuar të korruptojë gjithashtu një police, e cila si përgjigje i ka kërkuar të dalë nga makina e të kthejë duart pas për prangosje.
Dhe nuk ka qenë e vetmja, sipas deklaratës policore për rastin, e cila thotë: “Gjatë 48 orëve të fundit, janë arrestuar në flagrancë pesë drejtues mjetesh, konkretisht: A. K., 39 vjeç, G. H., 30 vjeç, B. C., 20 vjeç, E. C., 50 vjeç dhe E. D., 40 vjeç, për tentativa për të korruptuar punonjësit e Policisë Rrugore.
Këta shtetas kanë tentuar t’iu ofrojnë punonjësve të Policisë së Shtetit, ryshfet, pasi u kapën në shkelje të rregullave të qarkullimit rrugor.
Lufta kundër kësaj veprimtarie të kundërligjshme do të intensifikohet ndaj shkelësve dhe ndaj punonjësve të Policisë, në çdo rast që ata do të kapen duke kryer korrupsion pasiv.
Për të përmbushur këtë qëllim, ftojmë qytetarët dhe mediat që të denocojnë çdo rast të abuzimit të punonjësve të Policisë, me detyrën”.
Kështu që zgjidhje mbetet të jesh në rregull me gjithçka gjatë drejtimit të automjetit, e nëse ndodh të ndëshkohesh, zgjidh ndëshkimin pa arrestim. /tesheshi.com/
