Nuk do të ketë një përjashtim të plotë të Rusisë nga Lojërat Olimpike të Rio de Zhanejros, që nisin në fillim të gushtit. Komiteti Olimpik Ndërkombëtar ka vendosur të mos i plotësojë kërkesat për një përjashtim të përgjithshëm të Rusisë, duke ua lënë federata përkatëse të përcaktojnë në do t’i lejojnë atletët rusë të garojnë.
Atletët do të duhet të plotësojnë kriteret e ngurta të Komitetit Olimpik Ndërkombëtar. Ata duhet t’u provojnë federatave ndërkombëtare se nuk kanë pasur asnjëherë probleme me dopingun gjatë karrierës së tyre, e se janë testuar nga organe të besueshme ndërkombëtare të antidopingut.
Nëse një atlet do të ketë patur më herët probleme të tilla me dopingun, ai nuk do të lejohet të garojë edhe pse mund t’i ketë kryer dënimet e parashikuara.
“Ne kemi vënë vijën për kufirin, duke vendosur një numër kriteresh shumë të ngurta, që çdo atlet rus duhet t’i përmbushë po qe se ai apo ajo dëshiron të marrë pjesë në Lojërat Olimpike Rio 2016,” deklaroi pasditen e djeshme Thomas Bach, kryetari i Komitetit Olimpik Ndërkombëtar.
Megjithatë, atletët rusë do të duhet të luftojnë me kohën, pasi Lojërat Olimpike janë në prag, e atyre u duhet së pari të vërtetojnë pastërtinë e tyre. /tesheshi.com/
