Një projektrezolutë e Francës për dërgimin e vëzhguesve të OKB-së në Halep për të mbikëqyrur evakuimin dhe për të ndihmuar në mbrojtjen e civilëve është e destinuar të përballet me veton e Rusinë kur ajo të votohet.
E ka paralajmëruar veton ambasadori i Rusisë në OKB, Vitaly Churkin, i cili u ka deklaruar gazetarëve se projektrezoluta do të hidhet poshtë, “sepse kjo është një katastrofë”.
Rusia ka bërë të njohur projektrezolutën e saj, që i kërkon OKB-së të bëjë rregullimet për t’i mbikëqyrur kushtet e civilëve që mbeten në Halep, por nuk e zë në gojë dërgimin e vëzhguesve.
Moska ka vënë veton mbi gjashtë rezoluta për Sirinë që prej nisjes së revoltës ndaj regjimit të Beshar Esadit në mars të 2011-s.
Këshilli i Sigurimit i OKB-së mblidhet sot për konsultime me dyer të mbyllura, pasuar nga një votim mbi propozimet, njëri prej të cilëve është projektrezoluta për dërgimin e vëzhguesve në Halep. /tesheshi.com/
