Moska nuk humb kohë. Menjëherë pas betimit të Aleksandër Vuçiçit si president i Serbisë dhe vendosjes së Iviça Daçicit si kryeministër i komanduar deri në zgjedhjen e qeverisë së re, Rusia ka shpallur ngritjen e një “zone ekonomike speciale” ndërmjet Beogradit dhe Moskës.
Kjo bëhet e ditur në një kryeartikull të portalit rus-Sputnik.
Njeriu i marrëveshjes së armëve, zv.kryeministri rus, Dimitri Rogozin, ai që kreu transaksionin e shitjes në Serbi të një sërë sistemesh raketore, Mig 29, si dhe tanke e blinda, shpalli nga Shën Petërsburgu ngritjen në Serbi të disa qendrave të fuqishme të industrisë high-tech të Rusisë.
Rogozin nuk dha shpjegim nëse investimet do të jenë civile apo ushtarake, pasi dihet se mbi 60% e industrisë së teknologjisë së lartë në Rusi punon për llogari të Forcave të Armatosura të Moskës, vendeve të ish-Bashkimit Sovjetik, por edhe për shitje në disa shtete të Lindjes së Mesme, aleatë të Rusisë, si dhe në Kinë, Korenë e Veriut, apo vende të tjera aziatike.
Marrëveshja për këtë, tha ai, është arritur me kryeministrin e Serbisë, Ivica Daçiç.
Daçiç tha se takimi i komisionit të përbashkët për këtë çështje do të mund të mbahen në tetor.
“Beogradi është i interesuar në zgjerimin e bashkëpunimit me Moskën në sektorin e energjisë dhe rritjen e tregtisë”, tha Daçiç në Forumin Ekonomik Ndërkombëtar të Shën Petersburgut. /tesheshi.com/
