Rusia ka nisur manovrat ushtarake në ujrat siriane duke aktivizuar 15 mjete luftarake lundruese, që nga kryeqëzori modern Kalibr deri tek nëndetëset e pajisura me raketa me rreze të gjatë veprimi.
Siç bën të ditur agjencia Interfax, armata ruse ka dërguar në Douma policinë ushtarake për të penguar inspektorët perëndimorë në zonë.
Në frontin politik, Vladimir Putin ka nisur ta shfrytëzojë menjëherë përçarjen që po përjetojnë vendet europiane për Sirinë, duke nisur nga Italia.
Pas deklaratës së njërit prej kandidatëve për kryeministër të Italisë, Matteo Salvini, se Italia nuk do të marrë pjesë në bombardimin e Sirisë, presidenti rus ka deklaruar se Roma është një nga aleatët e rëndësishëm të Rusisë brenda BE-së.
Në ceremoninë ku ambasadori italian në Moskë, Pasquale Terraçiano, ka nisur zyrtarisht punën duke dorëzuar letrat kredenciale, Putin tha se “Italia është një nga partnerët tanë kyç në BE. Moska është e interesuar për të thelluar bashkëpunimin me Italinë, me të cilën kemi relacione kulturore që janë shembull për kombet e tjera”.
Por në këtë debat ka ndërhyrë menjëherë zv.ministri i Jashtëm i Italisë, Vincenzo Amendola, i cili po kryen detyrën e shefit të diplomacisë deri sa të krijohet qeveria e re.
“Atyre si Mateo Salvini që kërkojnë një pozicionin të Italisë kundër ndërhyrjes ushtarake të Perëndimit në Siri, i kujtojmë se Italia gjithmonë ka dënuar në mënyrë të qartë çdo përdorim të armëve kimike: përdorimi i tyre është një krim lufte dhe është në shkelje të ligjeve ndërkombëtare. Thënë këtë, qeveria italiane është në krah të aleatëve tradicionalë të vendit tonë: SHBA, Francës e Mbretërisë së Bashkuar. Nëse Salvini mendon ndryshe ta thotë qartë këtë”, tha Amendola.
Duket se SHBA nuk po lejon që elementët filorusë të kapin qeverinë Romës, pasi Italia është një bazë shumë e rëndësishme amerikane.
Në fillimet e Luftës së Ftohtë, SHBA përdori të gjitha mënyrat për të ndaluar një fitore të Partisë Komuniste Italiane, e cila ishte një nga aleatet më të forta të Bashkimit Sovjetik. /tesheshi.com/
