Nga Saimir Sulaj, Washington
Hetimi i nisur në maj të këtij viti në SHBA, i kryesuar nga prokurori i posaçëm Robert Mueller, duket se po sheh dritë në fund të tunelit. Ajo që njihet si juria e madhe miratoi të premten akuzat e para të ngritura nga ekipi i Mueller për çështjen e ndërhyrjes ruse në zgjedhjet amerikane të vitit 2016. Nëse akuzat vërtetohen, ky mund të jetë skandali më i madh shtetëror në SHBA, që prej kohës së atij të “Watergate” dhe mund të çojë deri në shkarkimin e presidentit Trump, në procedurën e njohur si “impeachment”.http://localhost/tesheshi/po-shkon-shba-drejt-watergate-2/
Akuzat në fjalë janë ende në dosje të mbyllura, me urdhër të një gjykatësi federal. Por siç njofton CNN, ato akuza do të çojnë në ndalimin e dikujt apo disa personave këtë të hënë. Ende mbetet e paqartë se për çfarë bëjnë fjalë këto akuza. Zëdhënësi i prokurorit special nuk ka pranuar të japë komente. As Shtëpia e Bardhë nuk ka komentuar për këtë lajm. Sipas rregulores për hetimet speciale për qeverinë, zëvendës prokurori i përgjithshëm, gjenerali Rod Rosenstein, i cili ka mbikëqyrur hetimin për çëshjten e Rusisë, duhet të ishte vënë në dijeni për çdo akuzë, përpara se këto akuza të dërgoheshin përpara jurisë së madhe për miratim.
Prokurori i posaçëm Robert Mueller po heton Presidentin Trump për pengim të mundshëm të drejtësisë. Zyrtarët e lartë të agjencive amerikane të inteligjencës janë intervistuar dhe po intervistohen nga grupi hetimor i drejtuar nga Mueller, nëse zoti Trump u përpoq t’i japë fund një hetimi mbi këshilltarin e tij të dorëhequr të sigurisë kombëtare, Michael Flynn dhe në lidhje me shkarkimin e shefit të FBI-së James Comey. Zoti Trump e cilësoi si sajim këtë proces në kohën kur u bë zyrtar në qershor.
“Ata shpikën një marrëveshje të fshehtë, totalisht e rremë. Nuk gjetën asnjë provë, dhe tani ata tentojnë të bllokojnë vënien e drejtësisë. Bukur!”, – do të shkruante zoti Trump në profilin e tij zyrtar në “Twitter”. Presidenti Trump ka mohuar në mënyrë të përsëritur çdo bashkëpunim me Rusinë. Ai e ka cilësuar hetimin e vazhdueshëm si një “gjueti shtrigash”, që u “udhëhoq nga disa njerëz shumë të këqinj dhe që nxisin konfliktin”.
Përse po hetohet Presidenti?
Raportet mediatike thonë se pengimi i hetimit filloi vetëm disa ditë pasi Presidenti Trump shkarkoi drejtorin e FBI-së Comey më 9 maj. Comey, i cili kishte udhëhequr një nga disa hetime, për çështjen e ndërhyrjes së mundshme të Rusisë, dëshmoi para Kongresit javën e kaluar se Trump kishte bërë presion që t’i jepte fund hetimit mbi ish-këshilltarin e Sigurisë Kombëtare, Michael Flynn. Flynn dha dorëheqjen në shkurt sepse nuk zbuloi dot shtrirjen e kontakteve të tij me Sergei Kislyak, ambasadorin rus në Ëashington. Ish-drejtori i FBI-së Comey dëshmoi nën betim që zoti Trump i kishte thënë gjatë një takimi privat: “Shpresoj se mund ta shihni rrugën tuaj të qartë për të lënë këtë, për të lënë Flynn të shkojë, ai është një djalë i mirë.”
Shtëpia e Bardhë ka thënë se presidenti nuk i ka kërkuar kurrë Comey-t apo ndonjë tjetri të përfundojë ndonjë hetim, duke përfshirë çdo hetim që përfshin gjeneralin Flynn.
Ndërkohë që Comey gjithashtu tha në dëshminë e tij se ishte “i sigurt që Mueller po shqyrtonte nëse Trump kishte penguar drejtësinë”.
Çfarë pritet të ndodhë
Raportet gjithashtu flasin për një hetim për pastrim të mundshëm parash ndërmjet bashkëpunëtorëve të Trump. Një ish-zyrtar i lartë amerikan tha për “New York Times” se çdo bashkëpunim midis ekipit Trump dhe zyrtarëve rusë do të ndiqej me një shpërblim dhe se mund të ketë pasur përpjekje për të fshehur rrugën e pagesave duke përdorur bankat në det të hapur.
Presidenti Trump ka kërcënuar vazhdimisht ndaj nxjerrjes në shesh të informacioneve nga FBI, duke thënë se ky është një rrëfim i rëndësishëm, jo konflikti i supozuar me Rusinë, të cilën ai e ka hedhur poshtë duke e konsideruar si “lajm i rremë”. Ndërkohë që “New York Times” ka raportuar se zoti Trump ka menduar edhe që të shkarkojë prokurorin Mueller, por është zmbrapsur nga ndihmësit e tij. Nëse nga raporti përfundimtar i prokurorit Mueller del që Trump ka penguar hetimet, vetëm një mrekulli do ta shpëtonte Presidentin amerikan nga procesi që njihet me emrin “impeachmet” këtu në SHBA, ose nisje e procedurave për shkarkimin e tij nga Kongresi. /tesheshi.com/
