Rusia dhe talibanët kanë mohuar raportet e mediave, sipas të cilave njësia e zbulimit ushtarak rus u ofroi luftëtarëve talebanë para për të vrarë ushtarët amerikanë dhe anëtarët e tjerë të koalicionit ushtarak të NATO-s në Afganistan.
Në një raport nga New York Times, inteligjenca amerikane përfundoi disa muaj më parë se një njësi ruse ofroi fshehurazi shpërblime për luftëtarët për sulme të suksesshme vitin e kaluar.
Ky informacion u botua më vonë nga Washington Post.
Zyrtarët pretendojnë se luftëtarët, ose njerëzit afër tyre, morën të paktën një pjesë të parave nga rusët, megjithëse mbetet e paqartë se cilat sulme janë rezultat i asaj marrëveshjeje, thuhet në raport.
Rusia të shtunën mohoi akuzat dhe ambasada në Uashington i quajti ato “të pabaza”, duke përmendur se akuzat “shkaktuan kërcënime të drejtpërdrejta për jetën e punonjësve të ambasadave ruse në Uashington dhe Londër”.
Zëdhënësi i talibanëve, Zabihullah Mujahid gjithashtu mohoi shkrimin e Times, duke thënë se grupi nuk kishte “marrëdhënie me asnjë shërbim inteligjence”.
Në vitin 2019, 20 ushtarë amerikanë u vranë në Afganistan. /tesheshi.com/
