Moska zyrtare ka njoftuar se forcat e saj dhe ato të regjimit sirian do t’i ndërpresin luftimet për një kohë të shkurtër ditën e enjte për arsye humanitare.
“Kemi marrë vendimin për të mos harxhuar kohë dhe për të shtënë “pauzat humanitare”, kryesisht për kalimin e lirë të civilëve, për shpërnguljen e të sëmurëve dhe të plagosurve, si dhe për tërheqjen e luftëtarëve,” ka deklaruar Sergei Rudskoi, një ushtarak i lartë rus, në një konferencë shtypi një ditë më parë.
Ai bëri të ditur se ndalimi i zjarrit vlente për zonën e Halepit, e se do të niste në tetë të mëngjesit me orën lokale, për të përfunduar në katër të pasdites.
“Forcat ajrore ruse dhe trupat qeveritare siriane do t’i ndalin sulmet ajrore dhe zjarrin gjatë kësaj kohe,” tha Rudskoi.
Bashkimi Europian i ka cilësuar së fundi si “të barabarta me krime lufte” sulmet ruse dhe të regjimit siriane mbi Halep.
“Që nga fillimi i ofensivës prej regjimit dhe aleatëve të tij, posaçërisht Rusisë, intensiteti dhe shkalla e bombardimeve ajrore në lindje të Halepit është qartas e shpërpjestuar,” thuhet në deklaratën e ministrave të Jashtëm të BE-së pas bisedimeve në Luksemburg. /tesheshi.com/
