Pas vdekjes së tre ushtarëve turq të përfshirë në “Mburoja e Eufratit” në Siri, gjatë një sulmi ajror, Rusia ka bashkëpunuar me Turqinë në kryerjen e një hetimi, i cili hedh fajin mbi regjimin e Asadit për sulmin, njoftojnë mediat. Gazeta turke Hurriyet tha se sulmi fillimisht dukej se kishte për qëllim të prishë marrëdhëniet turko-ruse që ishin përmirësuar kohët e fundit që kur Turqia kishte goditur një bombardues rus vitin e kaluar.
Megjithatë, Rusia ka qenë shumë bashkëpunuese dhe ka siguruar Turqinë se ajo nuk ka kryer sulmin, duke ruajtur kështu lidhjet në mes dy fuqive. Pasi Turqia e ka paralajmëruar Rusinë se avioni i cili kreu sulmin ishte nisur nga një aeroport sirian i cili është nën kontrollin rus, Rusia ka kërkuar më shumë kohë për të hetuar këtë çështje, para se të kryhet një hetim i cili konfirmoi se një Albatros L-39 i Forcave Ajrore siriane kishte kryer sulmin.
Sulmet ajrore të regjimit mbi ushtarët turq erdhën një vit pasi Turqia rrëzoi një avion luftarak rus që solli marrëdhëniet midis dy fuqive të Detit të Zi në prag të kolapsit. Sipas njoftimeve, sulmet ajrore të regjimit sirian shkaktuan vdekjen e katër ushtarëve turq dhe plagosjen e dhjetë ushtarëve të tjerë.
Menjëherë pas sulmeve, dy avionë turq F-16 u nisën nga baza ajrore Inçirlik dhe mbërritën në vendngjarje 13 minuta më vonë, për të gjetur se avioni i cili kishte kryer sulmin ishte larguar.
Presidenti Rexhep Tajip Erdogan dhe kryeministri Binali Yildirim kanë mbajtur telefonata urgjente me ministrin e Mbrojtjes, Fikri Isik dhe Shefin e Shtabit të Përgjithshëm, Hulusi Akar para se të prononcohen për mediat. Yildirim u zotua se Turqia do të marrë hak për vdekjen e “bijve të saj heroikë”. Ai u tha gjithashtu gazetarëve në Ankara se “ka palë të ndryshme që nuk pajtohen me operacionin tonë ‘Mburoja e Eufratit’ kundër DAESH. Do të ketë hakmarrje për këtë sulm.”
Al-Araby Al-Jadeed tha se ky sulm i dha mesazhe të qarta Turqisë e cila mbështet opozitën siriane, dhe se sulmet ajrore ishte një paralajmërim që Turqia të mos përpiqet të zgjerojë kontrollin e saj afër Halepit dhe pjesëve tjera ku regjimi sirian nuk e dëshiron Turqinë.
Turqia tani është duke luftuar për të shtypur DAESH nga Al-Báb-i, e cila është shumë afër pjesës lindore të Halepit të kontrolluar nga opozita. /tesheshi.com/
