Ushtria ruse tha të martën se i kërkoi Turqisë të ndihmonte në rimarrjen e mbeturinave të avionit luftarak rus, që u rrëzua në provincën veriperëndimore të Idlibit në Siri gjatë fundjavës.
Militantët e lidhur me al-Kaidën të shtunën thanë se e kanë rrëzuar avionin rus Su-25 në Idlib. Zyrtarët rusë thanë se piloti ishte angazhuar me armë zjarri kundër militantëve para se të hidhte vetën në ajër me një granatë dore.
“Ushtria ruse i dërgoi një kërkesë palës turke për të ndihmuar në marrjen e të gjitha rrënojave të avionit luftarak rus Su-25, të qëlluar nga terroristët më 3 shkurt me një MANPADS në hapësirën ajrore mbi krahinën siriane të Idlibit”, tha Ministria e Mbrojtjes ruse në një deklaratë.
Ministria shtoi se i kërkoi Turqisë që të ndihmojë në rimarrjen e mbeturinave, me qëllim që të përcaktojë llojin e armëve të përdorura për rrëzimin e avionit.
Aeroplani u rrëzua nga një raketë portative e mbrojtjes ajror. Kjo ishte hera e parë që një avion rus u rrëzua mbi Sirinë që kur Rusia filloi fushatën ajrore atje në shtator 2015.
Në javët e fundit, forcat e regjimit të Asadit të mbështetura nga forcat ajrore ruse kanë intensifikuar sulmet ndaj Idlibit, pavarësisht se është caktuar një zonë e ashtuquajtur zonë e de-eskalimit me një marrëveshje ndërkombëtare midis Turqisë, Rusisë dhe Iranit.
Rusia është një aleat i madh i regjimit të Asadit, forcat e të cilit kanë arritur të rikthejnë territore nga opozita e moderuar në muajt e fundit.
OKB-ja thotë se më shumë se 270,000 persona janë zhvendosur në Idlib për shkak të sulmit të regjimit që nga data 15 dhjetor. /tesheshi.com/
